Io stev’ â fermata d’ ’o tramme
e cu’ l’ati perzone
ce steva ’na bella guagliona
purposa e sciasciona.
Teneva ’e capille
arricciate e russagne;
’a faccia cianciosa
pareva ’na rosa;
l’uocchie cu’ ’o cielo
facevano ’o iuoco;
’a vocca scarlata,
carnale e azzeccosa,
ardeva chiù assaie
d’ ’a vampa ’e ’nu fuoco...
Chiunque passava
- signore o cafone,
’mpurtante o chiachiello -
cunfromme ’a smicciava
ce se ’nfucava
comme s’appiccia
’nu zurfaniello,
e po’, suspiranno,
cu l’uocchie ’a spugliava.
Quanno ’o tramme fuie bello e arrivato
e nuie tutte quante ce fùiemo sagliute,
oi gente, sentite, ne’ chella che fa?
S’assetta, azzeccannose, e ’ncuollo me sta.
Maronna, che sciorta!
E che rè ’sta furtuna?
Putite penza’ io che me sentevo,
che già primma e sagli’
m’ero sperzo e ’nfumato
pe’ ’sta fémmena bella
ca s’era ’mmuccata.
’Nu verrizzo ’int’ ’a capa!
E facevo penziere
ca nun dícere è meglio
pecché (v’assicuro)
ce vulesse ’a censura.
Po’ me facette
’nu poco ’e curaggio
e nun me vulette
chiù mantene’:
«Signorina», le murmuliaie,
«Lei permette? Sa com’è…
Posso offrirle ’na sfugliata…
’na sfugliatella cu’ ’o cafè?».
Essa aggarbata me rispunnette:
«Gentile signore,
questo invito cortese
rifiutar non si può».
E accussì, scise da ’o tramme,
ce assettàimo a ’o tavulino
’e ’nu bar e ’’int’ ’o Pennino:
essa me pigliaie ’nparola
e vulette ’nu cafè
cu’ ’na sfugliatella riccia
mentre ’a frolla ’a dette a me.
Teneva tanta ’e chella carne ’ncuollo
ca nun sapevo addo’ êv’ ’a accumincia’,
po’ me lanzaie… ’na guardata làngueta…
e chella s’abbuccaie ’nzieme cu’ me.
L’abbracciaie, ’a vasaie, l’accarizzaie,
quanno â ’ntrasatta,
mentre io cercavo,
tastuliannola,
chillu pizzo là,
tuccaie ’na cosa…
ca cu’ tutto ’o riesto
nun ce azzeccava manco ’na rapesta.
Aneme d’ ’o Priatorio,
e che spaviento!
V’ ’o giuro, m’era parza overamente
’na femmena verace e originale…
Aggio pigliato ’o capo schiribizzo!
Chillo era ’nu femmenella,
e teneva ’o cetrulo a chillu pizzo.
Io, don Errico ’e vascio â Sanità,
ca songo canusciuto comm’ ’o primmo
d’ ’e meglie sciupafemmene in servizio,
comm’a ’nu masculone capuzziello,
me so’ fatto strunzia’ ’a ’nu fecatiello!
Uòmmene, tenimmo l’uocchie apierte
pe’ nun ’ncuccia’ ’n futuro
’na soccia fregatura,
pe’ nun piglia’ maie chiù
l’asso pe’ ’na fïura!
Carmen Percontra |
Nessun commento:
Posta un commento