se ne parla
’e chistu male trapuliero
ca porta pampanizze
e spanne patemiente.
I’ maie penzavo
ca cògliere
puteva iust’a me:
a trademiento,
senza ’nu iaquaniello,
’ncuorpo se n’è trasuto.
Se sta piglianno l’ànema
ma nun me fa appaura.
Te chiammano càncaro…
…Ê vote…
me pare pure doce,
quanno distrattamente
vaco cunzederanno
ch’aiere redevo
pazziavo sguadagnata,
maie putenno penza’
ca ’a vita mia cagnava.
E senza me ne accorgere
ogne ghiuorno
chistu male pati’
ca porto appriesso
me sta facenno fessa.
Ma io, a ’sta malatia,
io nce vulesse dicere:
«’O core ’o tiene
’e leva’ ’na mamma
a e figlie?».
Tengo sulo ’na smania
ca me turmenta l’anema:
io crescerme vulesse ’e figlie mie
sulo pe le ’mpara’ ’nu poco ’a vita,
e pe’ le fa’ capi’ ca chistu munno,
no, nun è malamente,
ma è sulo agguaitato
’a chi nun tene onore
né cuscienza
e, pe’ s’arrecetta’ ’n’onza
’e ascennente,
stutasse pure l’uocchie
â mamma soia.
Si ognuno ’e nuie
’a rispettasse
’sta terra utraggiata…
Essa s’è arrevutata
sulo pe’ s’addefènnere,
pirciò che ce costa…
Tenimmancella cara
e, comme si cantassemo
’a nonna a ’na criatura,
cercammo d’ ’a cunnulia’
propio come si fosse
’na nenna cu’ ’na ’nziria,
ca sulo frutte buone
essa ce vo’ riala’.
 |
| Carmen Percontra |
Nessun commento:
Posta un commento