Pareva ca n’arrivava maie
’stu iuorno ’mpurtante assaie,
l’aspettave ’a tantu tiempo
e puntualmente arrivaie.
’O tiempo passa,
cuntanno ’e minute e pure l’ore.
Stammatina…
nun s’era fatto manco iuorno
e ’a casa me pareva ’nu mercato:
’a truccatrice, ’a parrucchiera,
’o fotografo, ’o vennetore ’e sciure,
’nu trase e ghiesce ’e gente,
’e pariente che venevano
a da’ l’augurie â sposa.
Nenne’… Ogge è ’na data ’mpurtante,
annanze ô Signore t’aggi’ accumpagna’
e mentre ’o sposo tuio sta aspettanno
te voglio abbraccia’ e vasa’.
’Nu pate e ’na mamma
vanno truvanno ’o meglio p’ ’e figlie
e io e mammeta
vulimmo ’o meglio sempe pe’ te.
Mentre stevo penzanno pe t’accumpagna’,
â ’ntrasatta asciste appriparata
cu’ ’na vesta ianca ammerlettata:
me parive ’na riggina.
’O sciato mio se fermaie
e l’uocchie se ’nfunettero,
tanto ca ire bella
facevo fatica a te guarda’.
Ma tenive dint’all’uocchie ’a felicità,
e io cu’ ’a priezza ’int’ ’o core
te purtaie a spusa’.
Ogge è overo…
è destino ch’io perdo ’a nenna mia,
ma aggio truvato ’na fémmena
grande assaie,
ch’è addeventata mugliera
cu’ ’a speranza e tante neputielle,
spero sulo ca ’st’ommo
che mo te vaie a spusa’
felice pe’ tutta a vita te farrà.
 |
| Carmen Percontra |
Nessun commento:
Posta un commento