Ue’… Ue’… Currite, currite
femmene belle, zite e maretate,
sta arrivanno pe’ vuie Pulecenella:
comme se dice
«m’avit’a sulamente cumanna’»,
pirciò i’ stongo cà…
cu’ ’sta màscara curiosa
ca ve porta l’allería
scancellanno ’a pecundría.
Venite… ascite ’a rint’ê case,
abballate tutte quante
pe’ ’e quartiere e ’e strate ’e Napule;
me’, cantate a tutta stesa
cu’ ’sti core ’nzuccarate
comme fùsseve - che saccio -
tutte l’ore ’nnammurate
e facite ’o sentimento
sott’a chesta luna ’argiento.
Pigliammo tammurrielle e castagnelle
e sunammo tammurriate e tarantelle,
annanze a chesta bella gente
cuntammo ’a storia ’e sta città
mettennoce ’o core e l’ammore,
ca p’ ’o munno sempre ha da gira’.
Ce ’a pigliammo cu’ pacienza
(l’oro ’e Napule, gnorsì)
e menammo ’e guaie a mare
cu’ canzone ca cantammo
cu’ arrecrío e cu’ priezza.
’Sta città fuie tenagliata tanti vote,
ma tene ’nu popolo verace assaie
ca a nisciuna parte d’ ’o munno ce po’sta
pecché nun s’è fatto maie manca’
’a forza pe’ puterse recatta’.
 |
| Carmen Percontra |
Nessun commento:
Posta un commento